هذه المدونة تشمل مضمون 16 حلقة بالعربية الدارجة المغربية من سلسلة تحت عنوان ” من أجل مغرب ديمقراطي ” نشرت في هذا الموقع و في قنواتي maria charaf باليوتوب و تيكتوك و فايسبوك.
- يد في يد من أجل مغرب ديمقراطي
أنا مارية من المغرب، مََرحَبًا بكم في أول حلقة لي غدي نشرحو فيها شنو هي الديمقراطية وكيفاش يمكن لنا نتحدو جميع ونزيدو ببلادنا للقدام.
يمكن شي وحدين يقولو إوا راه المغرب فيه الديمقراطية، ها حرية الترشح فالأنتخابات، ها البرلمان، ها حرية خلق الشركات، أو وحدا خرين يقولو باقي طريق قدامنا طويل باش نوصلو للديمقراطية الحقيقية، حتى نشوفوها وصلت للشعب ملي كلشي يكون واكل و مكسي و قاري و خدام ومداوي. هاد شي علاش بغينا نفهمو شنو هي الديمقراطية ديال بصح، لي غدي نتقدمو بها و نقضيو بها على الفساد ونبحتو جميع على الحلول باش نحققو أمالنا في مغرب ديمقراطي.
فالديمقراطية ديال بصح، الحكومة كتخدم مصلحة الشعب كله ، كتحترم حقوق جميع المواطنات و المواطنين وكتسمع لهم باهتمام. وكتدير خدمتها بضميرو بشفافية وعدالة و كتشجع المواطنبن و المواطنات باش يشاركو فالعمل السياسي . و كالدير إصلاحات فالتعليم، و كتوفر الرعاية الصحية للكل، وكتنمي اقتصاد البلاد، و هاد شي كيستفد منوالأطفال و الشباب و النساء و الرجال أي كل فرد في المجتمع، كيف ما كان سنه أو وضعيته .
أما الديمقراطية ديال الديكور، كتكون فيها إنتخابات ديال الديكور، و المقاعد فالبرلمان كيديوها صحاب الشكارة لي كيبيعو و يشريو فالأصوات،. هذا النوع من الديمقراطية كيأدي للظلم والفساد، وضعف الثقة في المؤسسات، فهاد الحلة كيبدا ينقص الرواج الإقتصادي و كيشعرو المواطنات و المواطنين بالإنكسار والعجز، وهادشي كيجعل البلاد ترجع اللور عوض تزيد القدام.
فهذه السلسلة، غدي نقلبو على طريق لي يمكن نسلكو منها باش توصلنا للديمقراطية الحقيقية، و ناقشو الإصلاحات الضرورية باش مجتمعنا يتقدم على أساس العدالة والمساواة.
تابعومعنا الحلقات الجاية، إلى بغيتيو تقلبو معنا على الطريق لي توصلنا جميع للديمقراطية الحقيقية، ما تنساوش تتقاسمو هاد الحلقة مع الأصدقاء و الصديقات و تقولونا رأيكم في التعليقات. شكرا وإلى اللقاء.
- ما هي الديمقراطية؟
فهاد الحلقة غدي نحاولو نفهمو معنى كلمة ديمقراطية. الديمقراطية هي نظام ديال السياسة، الساس ديالو هو الشعب، كيشاركو فيه المواطنات و المواطنين في صنع القرارات ديال الحكومة، إما مباشرة أو بواسطة الناس لي صوتو عليهم في الإنتخابات. الديمقراطية الحقيقية كتضمن للمواطنات والمواطنين الحرية السياسية والمساواة ، و كيكون فيها احترام حقوق الإنسان و تطبيق عادل للقانون.
جدر ديال كلمة ديمقراطية جا من قديم الزمان و من حضارة اليونان، كان المعنى ديالها هو “الشعب هو لي كيحكم”، و من تم وصلت عندنا في زمانا هذا الديمقراطية بشكلها الجديد، كتسمى الديمقراطية التمثيلية، فيها كنمشيو نختارو في الإنتخابات النساء و الرجال لي غدي يمثلونا في البرلمان و كينوبو علينا في اتخاد القرارات، و كاينة الديمقراطية المباشرة، لي كتشرك المواطنين و المواطنات مباشرة في صنع القرارات و في القوانين و في السياسية، بحال الإستفتاء على الدستور.
قلنا فالاول بأن ساس الديمقراطية هو الشعب لي كيحكم ، دبا غدي نشوفو شنو هما السواري لي كتوقف عليهم الديمقراطية. هما ربعة ديال سواري بحال سواري ديال الدار، إلى نقصت أو رشات ساريا وحدة كتطيح الديمقراطية كلها:
1- السارية الأولى– الفصل بين السلطات : فالديمقراطية كاين 3 ديال أنواع السلطة. كاينة السلطة دالبرلمان حيت هو لي كيصادق على القوانين وعلى ميزانية الدولة والأحزاب لي عندها الأغلبية فالبرلمان هي لي كتكون منها الحكومة. و السلطة الثانية هي الحكومة و السلطة الثالتة هي القضاء. باش ما نطولوش هاد الفيديو، غدي نخصص الحلقة المقبلة لشرح العلاقة بين هذه السلطات بتلاثة
2-السارية الثانية الحقوق المدنية والسياسية، لي مكتوبة في الدستور وفي مواثيق حقوق الإنسان في العالم و في القوانين ديال البلاد
3-السارية الثالتة: الانتخابات الحرة والنزيهة، بلا ما يتدخل فيها لا قايد لا مقدم لا فلوس لا زرود
4-السارية الرابعة: الحكم الرشيد، يعني ناس لي كيحكمو لبلاد يكون عندهم ضمير و قلبهم على الوطن، و يقضيو على الرشوة و فساد بلا تبذير أموال الشعب و بلا حكرة أواستبداد.
الحكم الرشيد هو لي كيبني ديمقراطية على ساس صحيح، و ما كيغش فالسواري و إلا غدي يجي واحد نهار لي هديك الديمقراطية المغشوشة غدي تردم فوق ريوسنا كاملين ، هاذ سواري هي لي كتضمن باش تكون الحكومة مسؤولة قدام الشعب، و تكون القوانين لي كتطبق علينا عادلة ومطابقة مع لدستور ومع الإتفاقيات الدولية ديال حقوق الإنسان. و مع القوانين ديال لبلاد. إذا عجباتكم هاد الحلقة ما تنساوش تقاسموها مع الصديقات و الأصدقاء و يمكن تشاركونا في النقاش بالتعليقات ديالكم. شكرا وإلى اللقاء.
- الديمقراطية البرلمانية
مَرْحَبَ بك في فيديو جْدِيدْ من سلسلة “لنتحد من أجل مغرب ديمقراطي!” فْهَادْ الْحَلْقَة غَدِ نتكلمو على الدِّيمُقْرَاطِيَهْ الْبَرْلَمَانِيَهْ.
الديمقراطية البرلمانية واقفة على 3 د ساريات : البرلمان و الحكومة و القضاء.
أولا البرلمان لي كيَتَكَوَّن مِنْ غُرْفَهْ واحدة بحال الدانمارك و السويد أو جوج غرف بحال المغرب. لي فيه مجلس النواب و مجلس المستشارين ، البرلمان عندو سلطة تشريعية يعني كيكتب القوانين وكيناقشها كيصادق عليها أو كيرفضها، و كتعرض عليه الحكومة قانون المالية ، أي شنو هو مدخول الدولة وشحال غدي تنفق فكل قطاع و من بعد كتدوز هاد القوانين لمجلس المستشارين باش يراجعها. الأحزاب لي عندها الأغلبية فالبرلمان كتحالف بينتها باش تكون الحكومة. لان قليل فاش كيجيب شي حزب الأغلبية لي تسمح لو باش يكون حكومة بوحدو. فالغالب كتحالف بعض الأحزاب بينتها باش تكون حكومة أغلبية.
البرلمان كيراقب و كيحاسب الحكومة و يمكن ينزع منها الثقة و يدفعها للإستقالة، هاذ شي علاش الحكومة خصها تحافظ على دعم الأغلبية البرلمانية.
ثانيا: الحكومة و هي السلطة التنفيذية، كنسميوها التنفيدية حيت هي لي كتطبق القوانين و كتصرف الميزانية و كتسير الوزارات وهي لي كتحمل المسؤولية السياسية أمام البرلمان و كتقدم لو تقارير كتشرح فيها البرنامج الحكومي و الإنجازات و كتجاوب على أسئلة النواب و النائبات و هذ النوع من الديمقراطيات هو الأكثرانتشارًا في العالم.
ثالثا القضاء : غدي نخصصو له حلقة قريبا.
فالديمقراطية البرلمانية، رئيس الدولة عندو دور شرفيً، لكن رئيس الوزراء هو الي كيسير المؤسسات الدولة لي تابعة لو.
الأحزاب السياسية في الديمقراطيات البرلمانية كتهتم و كتخدم مصلحة المواطنات و المواطنين لي انتاخبو عليها وكتدافع على مطالبهم في البرلمان وفالبرامج دالحكومة .
في الديمقراطية البرلمانية، الانتخابات الحرة و النزيهة مهمة في تكوين البرلمان والحكومة و التحالفات الحكومية ضرورية . كل بلاد كتطبق الديمقراطية البرلمانية حسب موازن القوي و شنو الهدف ومستوى التقدم لي بغات توصلوليه. في الديمقراطيات البرلمانية الحقة، يكون صوت الشعب مسموع و مصلحتو هي الهدف ديال الدولة و دالأحزاب و النقابات.
فالحلقة المقبلة، غدي نتكلمو على الدور المهم د القضاء، في الأخير،ما تنساوش تقاسمو الفيديو و تكتبونا رأيكم في التعليقات. شكرا و إلى اللقاء.
- لنعمل معا من أجل قضاء مستقل و نزيه
مَرْحَبًا بِك فِ فِيديُو جَدِيد مِنْ سِلْسِلَةِ “لِنَتَحِدْ مِنْ أَجْلِ مَغْرِبٍ دِيمُوقْرَاطِيٍّ!”. غدي نتكلمو فهَذِهِ الْحَلْقَ على أَهَمِيَّةَ الْقَضَاءِ فِي بناء و إنجاح الدِّيمُوقْرَاطِيَّة الْبَرْلَمَانِيَّة وَالْحِفَاظِ عَلَى الْقَانُونِ وَالنِّظَامِ الْعَامِّ، وَحِمَايَةِ الْحُقُوقِ وَالْحُرِّيَّاتِ د لْأَفْرَادِ و دالْمَجْمُوعَاتْ.
شنو هوالقضاء؟ الْقَضَاءُ هُوَ السُّلْطَةُ الثَّالِثَةُ فِي الدُّوَلِ الدِّيمُوقْرَاطِيَّةِ، مع البلمان و الحكومة وعندو خمسة د المهام رئيسية: الْفَصْلُ بَيْنَ السُّلْطَ ، المُرَاجَعَةٌ الدُسْتُورِيَّةٌ ، حِمَايَةُ الْحُقُوقِ وَالْحُرِّيَّاتِ ، تَفْسِيرُ الْقَوَانِينْ، الرَّقَابَةُ عَلَى الْحُكُومَةِ.
أَوَّلً مهمة هي الْفَصْلُ بَيْنَ السُّلْطَ و ضمان التوازن بين سلطة الحكومة و سلطة البرلمان، هاد شي علاش خصو يكون مستقل باش ما تأتر حتى جهة على القرارات ديالو وعلى الأحكام، و باش يكسب ثقة المواطنات و المواطنين. القضاء هو مجموعة من المؤسسات والقواعد والإجراءات الي كتنظم عمل العدالة في الدولة، الهدف ديالها حماية الحقوق والحريات وضمان سيادة القانون. كتتكون منظومة القضاء من المحاكم (محاكم ابتدائية، استئناف، والنقض)، والنيابة العامة، ومكاتب تنفيذ الأحكام و القوانين واللوائح الي كتحكم ف سير العدالة وكتنظم الإجراءات القضائية، بحال قانون الإجراءات المدنية والجنائية، وقانون المحاكمات، وقوانين الإثبات، وقانون الأسرة، وغيرها.
القضاء كيضمن تطبيق القوانين بشكل عادل ومنصف. و كيفصل في النزاعات بين الأفراد أو بين الأفراد والمؤسسات، وكيعاقب على الجرائم الجنائية، وكيوفر وسائل حماية الحقوق والحريات الدستورية.
المهمة الثانية ديال القضاء هي المُرَاجَعَةٌ الدُسْتُورِيَّةٌ:يمكن لو مُرَاجَعَةِ الْقَوَانِينِ لي صَادِقُ عَلَيْهَا الْبَرْلَمَانُ باش يتأكد بلي راها مُطَابَقَة لِلدُّسْتُورِ وَكتَحْتَرِمُ الْحُقُوقَ وَالْحُرِّيَّاتِ ديال الناس.
المهمة التَالِثًا د القضاء هي حِمَايَةُ الْحُقُوقِ وَالْحُرِّيَّاتِ ديالنا و يَحْمِينا من التَّعَسُّفِ الْحُكُومِيِّ وَيَضْمَنُ لِلْمُوَاطِنِينَ وَالْمُوَاطِنَاتِ الحُقُوقَ ديالهم لي موتقة فِ الدُّسْتُورِ وَفالْقَوَانِينِ.
المهمة الرابعة ديال القضاء هي تَفْسِيرُ الْقَوَانِينْ وكيسهر على تَطْبِيقِ ديالها وَ كيُسَاهِمُ فِي تَنْفِيذِ الْقَوَانِينِ ب العَدِلٍ.
المهمة الخامسة ديال القضاء هي الرَّقَابَةُ عَلَى الْحُكُومَةِ، القضاء كيراجع الْقَرَارَاتِ الْحُكُومِيَّةِ وَالإِدَارِيَّةِ، باش يَضْمَنُ بأَنَّ الْحُكُومَةَ حتى هي كتحترم القانون وَما كتخرجش على الصَّلَاحِيَّاتِ لي معطيا لها. الْقَضَاءَ فِي الدِّيمُوقْرَاطِيَّةِ الْبَرْلَمَانِيَّةِ كيحْمِي حُقُوقَ الْإِنْسَانِ، و كيَضْمَنُ التَّطْبِيقَ الْعَادِلَ لِلْقَانُونِ و كيَقوي الْعَدَالَةِ وَالْمُسَاوَاةِ وَالشَّفَافِيَّةِ فِي الْمُجْتَمَعِ ويَمْنَعُ تَمْرَكُزَ السُّلْطَةِ وَيَحْمِينا مِنَ الاسْتِبْدَادِ.
هدا علاش خصنا، فين ما كنا، نطالبو بقَضَاءٍ مُسْتَقِلٍّ وَنَزِيهٍ. شكرا وَإِلَى اللِّقَاءِ فِي حَلْقَةٍ قَادِمَةٍ.
- العلمانية وطن للجميع
مرحبا بك فهاد الحلقة الخامسة من سلسلة ” لنتحد من أجل مغرب ديمقراطي”
اليوم غدي نتحدثو على العَلْمَانِيَة والأهمية ديالها ف إنجاح الديمقراطية. لأن بزاف دناس ما كيعرفوش أش كتعني العَلمانية، و كاين لي سمع بها و لكن ما فاهمهاش أو فاهمها غلط.
شنو هو جدر ديال كلمة عَلمانية؟
كلمة “عَلمانية” في اللغة العربية جات من كلمة لاتينية، كتعني الزمان أو “العالم” بمعنى الأمور ديال الدنيا لي ما عندها علاقة بالدين.
فصل الدين عن السياسة
العلمانية هي نفصلو ف الدولة بين الدين و بين السياسية والقانون ، باش القوانين لي كتطبق ف البلاد تكون عقلانية، و أخلاقية وعلمية و عصرية الهدف ديالها سعادة الإنسان وباش الدولة تسد الطرق على المهرجين من تجار الدين، لي بغاو يرجعو البلاد للور و يدفعو بشبابنا يقطع البحر في الفلايك د الموت باش يهرب يعيش فالبلدان العلمانية، لي فيها العدالة والمساواة و سعادة الإنسان واحترام كل الأديان و المعتقدات.
تعزيز التعددية والتسامح
لعلمانية كتحترم كل الأديان و الثقافات وكتعطي فرصة المشاركة لِكُلِّ مُوَاطِنِنْ و مواطنة، كيف ما كان دينهم و معتقداتهم، اَلْمُشَارَكَةُ فِي الْحَيَاةِ السِّيَاسِيَّةِ وَالْمُسَاهَمَةِ فِي اتِّخَاذِ الْقَرَارَات تْبلا فرزيات ،وكتشجع الدولة التسامح والتفاهم بين الجميع.
حماية الحريات الفردية
العلمانية كتضمن حماية الحريات الفردية و حرية العقيدة والتعبير. كل فرد عندو الحق يعتنق الدين الذي بغاه أو ما يعتنق أي دين، بلا ما يخاف من التكفير أو الاضطهاد. كف ما جا ف الآية 29 من سورة الكهف: “وَقُلِ الْحَقُّ مِن رَّبِّكُمْ فَمَن شَاءَ فَلْيُؤْمِن وَمَن شَاءَ فَلْيَكْفُرْ. و هذ حرية العقيدة هي أساس الديمقراطية الحقيقية.
الديمقراطية المستقرة
ف الدول التي كتطبق العلمانية، كيكون النظام الديمقراطي مستقر أكثر. الفصل بين الدين والدولة كيمنع الصراعات الدينية أنها تتحول إلى صراعات سياسية، و كيبعد ع لبلاد العنف الطائفي والْحُرُوبُ الَّتي تُسَبِّبُ خَسَائِرَ إِنْسَانِيَّهْ وَ اجْتِمَاعِيَّهْ وَ اقْتِصَادِيَّهْ، كيَكُونُ ضَحِيَّتُهَا الْعَدِيدُ مِنَ الأَبْرِيَاءِ و هوما وليدات الشعب. العلمانية كتسهل النجاح فالقضايا المهمة بحال التنمية والتقدم الاجتماعي.
العلمانية كتدعم الديمقراطية لأنها كتساهم في قواعد الحكم الرشيد والفصل بين السلط لي تكلمنا عليهم فالحلقات السابقة، وكتقوي الحريات الفردية، وكتوفر بيئة ملائمة للتعايش السلمي و الحضاري بين المواطنين و المواطنات ومع الشعوب الأخرى.
خلاصة القول
الْعَلْمَانِيَّةُ كتضمن الْمُسَاوَاةْ بَيْنَ كل أفراد المجتمع في الْحُقُوقْ وَالْمَسْؤُولِيَاتْ. الْعَلْمَانِيَّةُ ما كتنفيش لِلْقِيَمِ الدِّينِيَّةِ، لأنها كتُحْتَرَمُ كل العَقَائِدُ الْفَرْدِيَّةُ، وكتقوي التعددية الثقافية والدينية، وكتضمن الاستقرار السياسي. باش يمكن للمجتمع ديالنا يتنما ويزدهر و يحترم التنوع ويحمي حقوق الإنسان لجميع مواطنات و المواطنين.
كنتَمَنَّى باش نَلْحِقَو جَمِيعً بِرَكْبِ الْحَدَاثَةِ وَ الْعَلْمَانِيَّةِ.
بارطاجي هاد الحلقة منفضلك و أكتب رأيك ف التعليقات، شكرا وإِلَى اللِّقَاءِ.
- مسار التكتلات السياسية بالمغرب
“مرحباً بكم ف هاد الحلقة من سلسلة لنتحد من أجل مغرب ديمقراطي
اليوم غدي نلقيو نظرة سريعة على تاريخ التكتلات السياسية وأهمية الدور ديالها ف التحولات لي عشناها ف المغرب.
🔹غدي نبداو من وقت الاستعمار، بعدما تحالفت سبانيا مع فرنسا و هزمت مقاومة عبد الكريم الخطابي ف شمال المغرب.
تكونات الرابطة الوطنية ف العشرينات من القرن الماضي ، وكانت أول تكتل سياسي بغى يواجه الاستعمار الفرنسي والإسباني، وهاد الرابطة هي لي بنات الساس ديال الحركة الوطنية المغربية.
🔹عشر سنين من بعد، وملي تزادت ضغوط د الإستعمار، بان تكتل الحركة الوطنية، لي بدا كووعي المغاربة بالهوية الوطنية ديالهوم وعبأ هوم حتى تحررنا من الإستعمار و حصلنا على الاستقلال.
🔹 في عام 1970، تأسسات الكتلة الوطنية، التي جمعات حزب الاستقلال والاتحاد الوطني للقوات الشعبية. هذه الكتلة كانت رمز للوحدة الوطنية في مواجهة التحديات السياسية الي كانت فداك الوقت.
🔹 في عام 1972، ظهر التنسيق الجبهوي بين منظمة إلى الأمام ومنظمة 23 مارس لي كانوا كيدافعو على الطبقات المسحوقة و واجهو الظلم والقمع والإستبداد والتعذيب لي كان فسنوات الرصاص.
🔹 من بعد، كانت بزاف ديال المحاولات لتوحيد كلمة الأحزاب الوطنية الديمقراطية، نتجت عليها الكتلة الديمقراطية في عام 1996، والي كانت كتجمع حزب الاستقلال، والاتحاد الوطني للقوات الشعبية، والاتحاد الاشتراكي للقوات الشعبية، وحزب التقدم والاشتراكية ومنظمة العمل الديمقراطي الشعبي. جات هاد الكتلة فالوقت لي كانت فيه المشاورات بين الإتحاد الإشتراكي و الحسن الثاني حول المشاركة في الحكومة، باش ينقد البلاد لي كانت قربت تجيها سكتة القلبية و باش يضمن استقرار البلاد و يسهل إنتقال ديال السلطة من الحسن الثاني ل محمد السادس. وكان الأستاذ عبد الرحمن اليوسفي هوا لي تزعم هد التحول بفضل تاريخو فالحركة الوطنية ونضالو السياسي. السي اليوسفي دار إصلاحات كبيرة فبزاف د المجالات رغم أن البعض دارولو العصا فالرويدة و ما عطاوهش الإمكانيات الضرورية والميزانية لي تكفيه المشاريع ديالو.
🔹 في سنة 2004، تأسس تجمع اليسار الديمقراطي اللي كان فيه حزب الطليعة الديمقراطي الاشتراكي، المؤتمر الوطني الاتحادي، واليسار الاشتراكي الموحد، والنهج الديمقراطي، و جمعية الوفاء للديمقراطية.
كل هذه التجارب بينات كيفاش يمكن للتكتلات انها توحد الكلمة و العمل النضالي ديال عدة فصائل وأحزاب باش يوصلو لتحقيق الإستقلال وباش ينسقو أهدافهم و برنامجهم السياسي باش يسلكو فالطريق لي كتوصل للديمقراطية،
إذا أعجبكم هذا الفيديو، ما تنسواش تشاركوه و تكتبو رأيكم ف التعليقات . شكرًا لمتابعتكم، وإلى اللقاء في فيديو قادم!
- ريادة التغيير من أجل مغرب ديمقراطي
مْرَحْبَ بِكُمْ فْ هَادْ الْحَلْقَ مِنْ سِلْسِلَةْ لِنَتَّحِدْ من أجل مغرب ديمقراطي. اليوم غدي نتكلمو على ريادة التغيير، باش نفهمو شنو هي الريادة؟ و شنو هي أوصاف الشخصية الرائدة؟ وشنو بغينا نغيرو؟
الريادة ماشي هي الرياضة الريادة بالدارجة هي الزْعامة. هي الصفة د الزعيم او الزعيمة، لي قادرين يقنعو الناس و يحمسوهم باش يحققو الهدف لي كيجمعهم و ينجحو فتغيير الوضع الحالي إلى مستقبل أفضل بواسطة انتقال ديمقراطي حقيقي.
كنتكلمو على ريادة التغيير ملي كيكون الوضع الحالي ما كيرضيناش كلو أو شي حوايج فيه لي مزال خصنا نتقدمو فيها، مثلا الحق فالعمل اللائق وفالحياة الكريمة و فالصحة.
ريادة التغيير ضرورية فعالم السياسة، باش يكون عند المواطنين و المواطنات مثال أعلى يجمع كلمتهم و يضوي طريقهم باش يتمتعو بحقوقهم و يوصلو للديمقراطية الحقيقية.
باش تولي شخصية رائدة للتغيير، خصك تكون شخصيتك اجتماعية و منفتحة على الإخرين، و محبوبة و متعاونة و جديرة بالثقة.
كتتحمل المسؤولية وتكون حياتك منظمة و نفسيتك مرتاحة و كيمكن لناس يعولو عليك، و خص تكون عندك القدرة على لإبداع حلول جديدة للمشاكل المطروحة باش تساهم و تساهمي فالتغيير وباش نوصلو للديمقراطية الحقيقية فبلادنا.
يمكن تتساءلو واش حتا نتوما تقدرو توليو زعماء و قدوة للتغيير؟
الجواب هو نعم. يمكنلك تطور و تطوري قدراتك باش تكسبي هاد الخصال دالريادة أو دالزعامة ، بالقرايا و التكوين وكذالك بالنضال ف الجمعيات و النقابات و الأحزاب .
- إوا اش كتسناو؟
- يالله نوضو جمعو الوقفة
- شنو هو الهدف ديالكم؟
- و معامن بغيتو تقطعو الطريق لي توصلكم للمستقبل لي كتمناو؟
إلى عجبكوم هاد الفيديو ما تنساوش تتقاسموه مع الأصدقاء و الصديقات و إلى اللقاء.
- بت نبت
مرحبا بكم فحلقة جديدة من سلسلة لنتحد من أجل مغرب ديمقراطي. اليوم غدي نعاود لكم قصة بحال لخرافة ديال واحد البنت سميتها شامة.
مشات شامة واحد نهار للكوميسارية باش تجدد البطاقة الوطنية و الباسبور
سولها البوليسي : علاش بغيتي الباسبور؟ جاوباتو شامة: غدي نسافر لكندا.
تعجب البوليسي و قلها: صافي سخيتي بنا؟ بغيتي تهربي ؟
شامة جاوبتو : أبدا، أنا بت هنا انبت
فنظركم علاش شامة بغات تسافر لكندا و ترجع من بعد للمغرب عوض أنها تحرق و تستقر في الخارج؟ بقاو معانا حتى الأخر الفيديو إلا بغيتيو تعرفو الجواب و اش كتعني ب بت نبت؟
شامة بغات تسافر لكندا باش تشوف بعينها التقدم لي وصلاتلو هاد لبلاد و تعرف كيفاش كيسييرو أمورهم السياسية و الاجتماعية و الاقتصادية وباش تفهم شنو لي كيجعل دولة بحال كندا فيها البرد كيجمد الدم فالودنين ولكن ناجحة فكلشي و الناس كيهاجرو ليها من كل بلاد وكيسمحو فالشمس لي في بلادهم.
مشات شامة لكندا وأكتشفت السر د النجاح ديالهم: هما كيطبقو الديمقراطية البرلمانية ديال بصح ماشي د ديكور، وعندهم نظام تعليمي كيساعد على النجاح و كيوفرو الرعاية صحية لكل أفراد المجتمع وعندهوم اقتصاد قوي كيخلق فرص العمل للشباب.
إوا دبا فهمتو شنو معنى بت هنا نبت؟
معناها هي نخرج تتسارى فالبلدان و نرجع لبلادي نعيش فيها.
خص كل مغربي و مغربية يكون بحال الزريعة لي واخا تطيح فوق الحجرة، كتشق الحجرة و كتعلي الراس باش تشوف الشمس فأرضها. ما كيهزهاش ريح الهجرة السرية.
شحال من مغربي و مغربية تتقاتلو مع الزمان ، قراو وفرجليهم صندالة حلومة و شكارتهم من الخيش و كبرو و نجحو و اليوم راهم فالنقابات و فالأحزاب و فالجمعيات كيدافعو على حقهم وحق الشعب فخيرات البلاد و فالعيش الكريم.
إلا كلنا خوينا لبلاد، لمن غدي نخليوها؟ قالك ما يحك جلدك غير ظفرك، إلا حستي بالظلم و بالحكرة، نوض اسيدي و يا لللة هضرو على حقكم حتى تخدوه و تكونو ساهمتيو فتحسين وضعية الناس لي بحالكم.
المثل كيقول: قطران بلادي حسن من عسل البلدان. لأن عسل البلدان كيولي مر ملي كتحس بالغربة و شي مرات بالعنصرية، بحال لي طاري دبا للعرب فأوروبا.
بلادنا محتاجة لبناتها و لولادها ، باش يتعاونو يبنيوها و ويزيدو بها القدام و حولوها لدولة مزدهرة كتوفر للمواطنين و للمواطنات الخدمة و الصحة و السكن وظروف العيش الكريم.
حتى نتوما ديرو بت نبت، و دفعو كروش لحرام لي واكلين رزقكم هما لي يهاجرو و يخويو لبلاد.
إوا أش كا تسناو؟ كل واحد او وحدة فينا تفكر باش يمكن تعاون بلادها،
يمكن تقولو واش درتي نتي؟ جوابي فهاد السلسة و فهاد الفيديو، كيف كيقول المثل:أول الغيث قطرة وقطرة بقطرة كيحمل الواد. و في الأخير، ما تنساوش تقاسمو هاد الفيديو ، شكرا و إلى اللقاء.
- الإتحاد قوة
نتحدو؟ علاش وكيفاش غدي نتحدو؟
يمكن نتحدو فنقابة مع ناس لي خدامين معنا، باش نحسنو الخلصة أوالسلامة أوحفظ الصحة أو ظروف العمل.
يمكن نطوعو فجمعية حقوقية أو ثقافية أو تنموية باش نتعاونو و نحققو الهدف لي كيجمعنا.
يمكن ننضمو ونتحدو فحزب ديمقراطي تقدمي وحداثي باش نساهمو فالحياة السياسية ونحققو الديمقراطية الحقيقية فبلادنا. ما تنساوش تقاسمو هاد الفيديو و إلى اللقاء.
- الأركان الخمس لإنجاح التكتل من أجل مغرب ديمقراطي
شفنا في حلقة سابقة أهمية التكتل ديال النقبات و الأحزاب الديمقراطية والحداثية باش نوصلو للديمقراطية الحقيقية. ولكن شنو هي شروط نجاح أي تكتل ؟
أولاً، خصنا نتكتلو حول الأهداف المشتركة لي بغينا نحققها وخص تكون عندنا رؤيا واضحة للمستقبل لي بغينا نوصلولو، ونخليو الخلافات ورانا، باش يسهال علينا نوصلو لهدفنا.
- لننفتح على كل الأراء
ثانيًا، من الضروري ننفتحو على كل مكونات المجتمع باش نشجعو كل الفئات يلتحقو بنا و يساندونا و خصنا نتفاعلو مع جميع الأطياف والآراء باش نوصلو لمجتمع ديمقراطي كيحضن الجميع.
- لنتواصل مع الجميع
ثالثًا، مهم نتواصلو مع الناس مباشرة و باستمرار باش نقويو الثقة مع المواطنات و المواطنين ونشرحو و ناقشو السياسات و النضالات و المجهودات باش نوصلو للديمقراطية الحقيقية.
- لنتكامل في التخطيط
رابعًا، التكامل في التخطيط باش كل فريق يكمل عمل الآخر ونحققو نتائج مزيانة. بحال ملي كتدير لبلان باش تبني دار. كل معلم كيتكلف بالصنعة ديالو.
- لننسق عملنا
خامسا وأخيرًا، التنسيق في التنفيذ مهم باش الخطط تولي عمل ناجح فالواقع ، بحال ملي كتبدا تبني الدار، كل معلم كيدير خدمتو و فنفس الوقت كيتعاون مع البنيا الأخرين، و مع تريسيان ومع البلومبي باش الدار تطلع ناضية بحال لبلان.
باش نتحدو من أجل مغرب ديمقراطي، ما تنساوش تتقاسمو هاد الحلقات إلى عجباتكم !
- تدبير الاختلاف لتعزيز تماسك التحالفات السياسية
التنظيمات لي كتحالف فالسياسة مشي ديما متفقا على كلشي، عندها أهداف مشتركة و لكن عندها نقط خلاف بسبب الصراعات الشخصية والطموحات الفردية ، حيث كاين لي بغي السلطة، و كاين لي كيخلق الصداع والعداوة.
كيمكن الصراع يكون سبابو عدم إتفاق الأحزاب على أولويات برنامج العمل أوبسبب غياب الوضوح في توزيع المسؤولية داخل التحالف، لأن الإحساس بالظلم كيسبب الخصام.
إلى ما تحلاتش هاد الخلافات، ما كتبقاش الثقة والتعاون بين الأعضاء، وإلى خرجات هاد الصراعات للعلن، كتوسخ الصورة و المصداقية ديال التحالف السياسي و كتنقص قيمتو فعيون الناس، ويمكن تبان الانشقاقات لي تأدي في النهاية إلى تفكك و فشل التحالف.
باش الحلف السياسي يدوم و يبقى متحد مدة طويلة رغم الخلافات و يحقق الأهداف ديالو، ضروري يتفقو الأحزاب على :
– طريقة لحل الصراعات بسرعة، ويخلقو لجنة الوساطة لحل النزاعات
– و يقويو الريادة التعاونية أو بالتناوب ويطبقو الشفافية والمساءلة باش تتقوى الثقة والالتزام بين الأعضاء.
– ويوثقو الثقافة و الرؤية و الأهداف و القيم المشتركة لي كتجمع الأحزاب ويقريو الأعضاء ديالهوم كيفاش يتعاملو مع الخلافات الشخصية والتنظيمية، باش التحالفات السياسية فالمغرب تدوم و تحقق أهدافها بفضل التواصل والتعاون والاحترام المتبادل.
- ما العمل ؟ – مقترحات للنقاش –
ا- التكتل حول رؤيا مغرب الكرامة والمساواة الفعلية والحرية والديمقراطية والعدالة الاجتماعية
ب- تحديد أهداف SMART و أولويات واقعية و مؤشرات لتتبع إنجازها
- تجميع قوى اليسار في جبهة والتحالف مع القوى الإجتماعية و القوى الديمقراطية لريادة التغيير
- فصل السلط وإعادة التوازن لموازين القوى و تفعيل و تقوية السيادة الشعبية في إنتاج الشرعية
- التحرر الوطني من الاستعمار و الإمبريالية والمديونية ومنظومة الرأسمال الاحتكاري الأجنبي
- إسقاط التطبيع
د- تسطير برنامج وتقويم الموارد و المهلة الضرورية لإنجازها
- فتح فضاءات اليسار للحوار من أجل تحليل الواقع وتدبير الإختلاف
- النضال المشترك واستقطاب الشباب والنساء والفئات المستفيدة من التغيير و الإنخراط في النضالات الجماهيرية
- فتح حوار عمومي مع القوى السائدة في المجتمع
- مواجهة الفساد و الإستبداد
- تعزيز كافة الحقوق وحرية التعبير وإطلاق سراح المعتقلين-ات السياسيين-ات والنقابيين-ات و الصحافيين-ات و المدونات-ين
- أرض أجدادي
عـَلـَيـْكِ مِنـِّي ســَـلاَمْ ….. يـَـا أَرْضَ أَجــــْــدَادِي
فـَــفِيكِ طـَابَ الْمُقـَـامْ ….. وَطــَـابَ إِنـْـشــــَــادِي
أَحْبـَبـْتُ فِـيـكِ السَّهَرْ ….. وَبَهـْجـَةَ النـــــَّـــــادِي
أَحْـبَـبْـتُ ضَوْءَ الْقَمَرْ ….. وَالْـكَـوْكَـبَ الْهــــَــادِي
وَاللَّـيْـلَ لَـمَّـا اعْـتَكَـرْ ….. وَالـنَّـهـْـرَ وَالــْـــوَادِي
وَالْفَـجـْـرَ لَـمَّا انْتَشَـرْ ….. فِي أَرْضِ أَجـــْـــدَادِي
أَهـْـوَى عُيُونَ الْعَسَلْ ….. أَهـْـوَى سـَـوَاقـِـيــــهَا
أَهــْـوَى ثُـلُوجَ الْجَبَلْ ….. ذَابـَـتْ لآلــِــيـــــــــهَا
هـَـذِي مَـجَارِي الأَمَلْ ….. سُبْـحــَــانَ مـُـجـْـرِيهَا
سـَـالَـتْ كـَـدَمْعِ الْمُقَلْ ….. فـِي أَرْضِ أَجــْــدَادِي
يـَـا قـَـوْمُ هـَذَا الْوَطَنْ ….. نَـفْـسِي تــُـنـَـاجـِـيـــــهِ
فَـعـَالِـجـُوا فِي الْمِحَنْ ….. جـِــرَاحَ أَهــْـلـِـيــــــهِ
إِنْ تـَـهـْـجـُـرُوهُ فَمَنْ ….. فِـي الْخـَـطْـبِ يَـحْـمِيهِ
يـَا مَا أَحـْـلَى السَّكَنْ ….. فِـي أَرْضِ أَجـــْــدَادِي
عـَلـَيـْكِ مِنـِّي ســَـلاَمْ ….. يـَـا أَرْضَ أَجــــْــدَادِي
فـَــفِيكِ طـَابَ الْمُقـَـامْ ….. وَطــَـابَ إِنـْـشــــَــادِي
