أهلا، اليوم غدي نتكلمو على حق البنت و المراة في الرعاية الصحية. شنو هي الرعاية الصحية؟
الرعاية الصحية هي تستفدي من الخدمات الطبية بلا فرزيات، يكونو عندك الفلوس أو ا عندكش، ساكنة فالعروبية أو في المدينة، كيف ما كانت حالتك العائلية أو وضعك الاقتصادي أو الاجتماعي.
شنو هي مسؤولية الدولة؟
من حقك تقريك الدولة كيفاش تحافظي على الصحة و النظافة ديالك، و تفهمي تكوينك الجسدي وكيف يمكن لك تحافظي على صحتك الجنسية والإنجابية. نظرا لأهمية موضوع الصحة الجنسية و الإنجابية، غدي نتكلمو عليه ف حلقة خاصة. من واجب الدولة توفرلك بانتظام المراقبة الصحية لي انتي محتاجة لها ، من نهار تزادتي وحتى تكبري و ملي تخدمي أو تحملي، و ملي تشرفي و تولي محتاجة لي يعتني بك. خص الدولة توفر لك مراكز فين يشرحولك وسائل منع الحمل وكيف تحمي نفسك من الأمراض المعدية. وتوفر سبطارات مجهزين بكل المعدات و الكفاءات الضرورية باش لبنات و النساء يتعلجو مزيان في الظروف العادية وحتى في حالة الطوارء بحال الزلزال أو الفيضان مثلا.
واش بالصح الوقاية أحسن من العلاج؟
إذا اعتنيتي بالصحة ديالك اليوم، غدي تبعدي عليك بزاف د الأمراض، و تعيشي هانية بلا مشاكل صحية أو نفسية ، حيث العقل السليم في الجسم السليم. را المرض يمكن يأثر على توازنك النفسي و يعرقل النجاح فالدراسة أو يقدر يحرمك من فرص الخدمة لي كتحلمي بها و ينكد عليك حياتك بالألم و فلوس طبيب وسبيطارو الدوا. من حقك تحترم خصوصيتك والكرامة ديالك خلال الفحص و العلاج. و ماخص تكون أي فرزيات بين البنات و الولاد و الرجال و النساء ف حق الرعاية الصحية .
لنعمل معا من أجل رعاية صحية جيدة للجميع
إوا يالاه يا ختي، نوضي راقبي الصحة ديالك و شرحي هادشي لخواتاتك و لبناتك و لصديقاتك و للوالدة ديالك و للنساء فعائلتك و فحومتك، باش كل وحدة تاخد حقها فالرعاية الصحية وتستفد من التغطية الإجتماعي. يمكنلك شاركي فشي جمعية بحملات التوعية دالأطفال و الشباب و الأسر باش الجميع يستافد فبلادنا من الرعاية الصحية.
