من حقي نخدم و نتخلص قد خلصة الراجل :
أهلا! اليوم غدي نتكلمو على حق كل امرأة في خدمة محترمة و فخلصة تعيش بها عيشة كريمة و تكون متساوية مع خلصة الرجل، “حق المرأة في الخدمة كيضمن لها المساواة في الفرص باش تكون مستقلة براسها وباش ما تعانيش من الفقر و العنف. كل امرأة من حقها تختار الخدمة لي توالم القدرة و الرغبة ديالها، بلا ما يقولها شي حد بلي هديك ماشي خدمة دالعيلات .
واش فخبارك بلي فبزاف دالبلدان و منهم بلادنا المغرب، مازال النسا كيتخلصو قل من الرجال وخا كيقومو بنفس الخدمة، خصك تعرفي بأنه من حقك تشدي نفس خلاص الرجل لأن المساواة في الأجور هو داخل ف حقك في الخدمة. لأن الخلصة كتعطى على حساب الكفاءة والخبرة ديالك لي ما عندها علاقة بالجنس ديالك واش أنثى أو ذكر.
عندك حقوق اخرى متعلقة بالأمومة:من حقك تستفدي من عطلة الأمومة ملي كتقربي تولدي أو من بعد الولادة . و من حقك تخرجي قبل الوقت باش ترضعي، و ماعندش الحق للمشغل أو المشغلة ديالك تطردك و أنت حبلى، والشركة لي كتخدم أكثر من 50 دالناس خص يكون فيها روض د لأطفال . و تكون بلاصة الخدمة آمنة، و محترمة، وما فيهاش الفرزيات.
من حقك تستافدي فخدمتك من الترقية و من حقك تولي رئيسة أو مديرة أو وزيرة أو رئيسة دولة، ومن حقك توفرلك الدولة وسائل باش توفقي بين الخدمة والعائلة أو حياتك الخاصة، بحال دور الحضانة و رعاية المرضى و المسنين ومهن المساعدة العائلية.
دبا سمعي مزيان، إلا كنتِ كتعاني من الفرزيات فالخدمة، أو كان كيتبسل عليك شحد أو كيتحرش بك جنسيا، سيري عند مفتشية الشغل باش تنصحك و توري لك الإجراءات لي خصك تديري باش تاخدي حقك. أو تسجلي فنقابة و خلقي فيها لجنة المرأة باش تدافعي فيها على حقوقك و يمكن تدفعي قضية فالمحكمة.
خصنا نتعاونو جميع باش يتحسن وضع المرأة في الخدمة و تولي متساوية فالحقوق مع الراجل.
إلى استفدتي من هاد الحلقة تقاسميها مع الأقرباء و ما تنسايش الاشتراك والضغط على جرس باش توصلك الحلقات القادمة!
